المواطن/ كتابات – خليفة علوان
كنت اتمنى من ضباط اللواء 35 ان يسلموا للشمساني من البداية مقابل سحب التحشيدات العسكرية من مسرح عمليات اللواء ويتقرصوا العافية ويلتفوا حوله حتى لو رشحته ام الصبيان ويدعموه في السير على نهج عدنان وهو ماشقصرش لانه بالاول والاخير رجل عسكري ومقاتل شرس يعرفوه اكثر مني وبحاجة لحد يقف جنبه ويدعمه منسب يتهيأ له الجو ويسكي يشتغل عسكري بعكس ماكان باللواء سبعتاعش مجرد كوز مركوز محوطين الاساددة علاو من كل جهه وجانب ميسكيش يحترك منهم
لكن تعاملوا معه وكأنه مرة حسن البناء على قولته ورفضوا القرار مثلك واسدق وسدقو ارامل عفاش انه شردوا السيل مطلع وشخندقوميه والكل وهم وقت الله الله مايصمدوش ليلة
حتى ماتعبروش بنكف ياسر العواضي وسيطرة عمهم تارق على صنعاء وبزعيمهم الدانق اللي عاده بداخل الثلاجه لليوم
المهم بس الا اندوا للاساددة عذر بارد مبرد ل اجتياح الحجرية وضحوا باسرة الجبزي مسكين وبعدين ربخوله وسلموا وهذا الشي كنت متأكد انه شحصل من يوم رجعوا من المركز وماخلوهم يوصلوا للتربة اللي هي تعتبر مسرح عملياتهم
قلتو بيني وبين نفسي شعملوا اذا الفيلم بس عشان مصالح خاصه بهم وشربخوله وموش بعيد يرجعوا يتآمروا على بعضهم البعض وكل واحد يتجمل بالثاني والجريمة الوحشية اللي حصلت بابن الجبزي دليل وافي بيوم الاستلام والتسليم
اما لو كانوا سدق حريصين على الحجرية وحقن الدماء فاتهم بحثوا عن اي مخرج لتجنيبه الصراع ومحاولة سحب التحشيدات العسكرية غير التهديد والوعيد بلقف مروش وقدهم داريين انه موش قادرين يحسموا الامر عسكريا
والان حصلوا بدل الصفعة صفعتين خلوهم يجتاحوا الحجرية بكل انواع الاسلحة ويرتكبوا ابشع الجرائم وسلموا اللواء بالغصب والتحشيدات العسكريه عاده اشتوسح اوناك باسم الحملة الامنية يتحرشوا بهم ويدلقصوهم مهما حاولوا يتقربوا منهم ويحسنوا العلاقه معاهم شبقوا الى الابد بنظرهم متمردين ومايمشي معاهم الا الصميل
بالمختصر اصبحوا مثل اذيك اللي عملت الاجب براسه وتسرح الوادي اشتلقط جراد ويلاقيها واحد قله لمو عاد اشتتعبي نفسك تنزلي للوادي تعالي بعدي شندي لك جونيه والا ثنتين معي بالبيت مليان جراد وهي سدقه وترجم بالاجب وتروح فرح بعده للبيت ويدقه ويهطر عاره فاضي لاعاد جاب له جراد ولا لقت الاجب حقه ولا سلم ….
………..
خليفة علوان
